Tashkent Metropolitan University va O‘zbekiston IIV huzuridagi 1-sonli Akademik litsey o‘zaro hamkorlik to‘g‘risida memorandum imzoladi
Toshkentda Tashkent Metropolitan University (TMU) hamda O‘zbekiston Respublikasi Ichki ishlar vazirligi huzuridagi 1-sonli Akademik litsey o‘rtasida strategik hamkorlikni nazarda tutuvchi memorandum imzolandi.
Mazkur hujjatga TMU rektori Behzod Jalilov hamda litsey direktori, polkovnik Sherali Turaev imzo chekdi.
Memorandumning asosiy maqsadi — o‘quv sifatini oshirish, motivatsiyalangan va kasbga yo‘naltirilgan yoshlarni tayyorlash, shuningdek, o‘rta va oliy ta’lim tizimlari o‘rtasida barqaror aloqalarni shakllantirish orqali ikki tomonlama hamkorlikni rivojlantirishdir.
Kelishuv doirasida iqtidorli o‘quvchilarni qo‘llab-quvvatlash, ularning chet tillari, matematika, huquqshunoslik va sun’iy intellekt yo‘nalishlaridagi ko‘nikmalarini rivojlantirishga alohida e’tibor qaratiladi.
Tomonlar sun’iy intellekt, ingliz tili, matematika kabi yo‘nalishlar bo‘yicha seminarlar, mahorat darslari, ochiq saboqlar va kasbga yo‘naltiruvchi uchrashuvlarni tashkil etishga kelishib oldilar. Universitet o‘qituvchilari tomonidan litseyga metodik va akademik yordam ko‘rsatiladi, jumladan, o‘quvchilarni olimpiada, tanlov va loyiha faoliyatlariga tayyorlashda amaliy ko‘mak beriladi.
Litseyda yuqori natijalarga erishgan va chet tillarini yetarli darajada egallagan bitiruvchilar uchun TMUga kirishda bir qator imtiyozlar nazarda tutilgan, xususan, xalqaro til sertifikatiga ega bo‘lgan abituriyentlar test sinovlarisiz qabul qilinishi mumkin.
Hamkorlik nafaqat o‘quvchilarga, balki litsey o‘qituvchilariga ham qaratiladi: universitet bazasida o‘quv-seminarlar, malaka oshirish kurslari tashkil etilishi, “ustoz-shogird” dasturini joriy etish, ta’lim dasturlarini takomillashtirish bo‘yicha qo‘shma faoliyat yuritilishi ko‘zda tutilgan. Shuningdek, universitet o‘quvchilarga mavjud stipendiyalar, to‘lovlarga chegirmalar va xalqaro akademik almashinuv imkoniyatlari haqida tizimli ma’lumot berishni o‘z zimmasiga oladi.
Tashkent Metropolitan University rektori Behzod Jalilov bu hamkorlik zamonaviy muammolarga moslashgan, innovatsion yechimlarga tayangan yangi avlod mutaxassislarini tayyorlash uchun barqaror platforma yaratishga xizmat qilishini ta’kidladi.
